Зал болгаш сезон ажыдыышкыны


Бөгүн, ноябрь 3-те, Тываның В.М.Халилов аттыг күрүне филармониязының септээн залының ажыдыышкынын, Тываның Чазааның үрер хөгжүм оркестри 9-ку чогаадыкчы сезону-биле ажыткан.

    Бирги күүселде соонда оркестриниң кыска допчу-намдарын, чедиишкиннерин филармонияның режиссеру, чарлакчы Владимир Копуш чыылган чонга таныштырды. Шынап-ла, 2008 чылда оркестр тургустунгандан бээр кыска үе дургузунда Тайвань, Кыдат, Моол, Казахстан, Эстония, Литва, Латвия, Польшаже үнүп, боттарының катаптаттынмас программазы-биле улуг үнелелди чаалап алганнар.

     1929 чылга чедир турган Тыва-арат революстуг шеригниң аъттыг үрер хөгжүм оркестри ышкаш, аът кырында оркестрни катап тургусканы дээш, Россияның Президентизиниң шаңналы, Ада-чурттуң Улуг дайынынга Тиилелгениң 65 чыл ою медальды ук коллектив алган. Аъттыг программазын Екатеринбург хоорайга, Тайваньның Чай-Ситиге, Польшаның Лобезу хоорайга аъттанып алгаш көргүскеннер.    

Оркестр бөгүн база мөгейикчилериниң сеткилин өөртүп, профессионал деңнели быжып турарын бадыткап, чаа программазын бараалгаттылар.

    Владимир Токаның, Петр Казимирниң, Буян-Маадыр Түлүштүң, Анатолий Кроллдуң чогаалдары-биле база Саая Бүрбээниң «Мөнгүн-Тайга» деп ырызын билдингир япон композитор-аранжровщик Хико Хатананың тургузуп аянаштырганы солун болду.

Оркестрниң тургузукчузу, хөгжүмчүлерниң башкызы чораан Тимур Дулуштуң чырык адынга, ооң өөнүң ишти Аяна Дулуш хөгжүмчү Артыш Опуйлаа-биле композитор Ростислав Кенденбильдиң «Дагларым» деп чогаадыын оркестр-биле ойнап күүседирге, залда орган көрүкчүлерниң сеткилдеринге, хомудалдың уян аялгазы кылдыр аар дегди…

Оркестрниң солистери Тыва Республиканың улустуң артизи Софья Кара-оол болгаш Эртине Тумат ыяңгылыг үннери-биле, дириг хөгжүм мөгейикчилериниң сагыш-сеткилин дүвүредип, чараш ырыларны бараалгаттылар. «Эки аъттар» деп ырыны, оркестрниң үделгези-биле республиканың уран-чүүл школазының сургуулдары бедик деңнелге күүсетилер.

Концерттиң ийиги чартыында аныяктарга бараалгаткан программа карак чивеш аразында эрткен ышкаш болду.

Ажыдыышкынга чедир филармонияның концерт килдизиниң ажылдакчылары боттарының күжү-биле сценаның өрү-куду шимчедир механизмнерин, үн болгаш чырык апараттарын септеп кылганнар. База ол ышкаш, техниктиг ажылдакчылар көрүкчүлер залы болгаш фойениң косметиктиг септелгезин, чырыын кылганы көрүкчүлерге таарымчалыг байдалдыг болуп, эки дыштанган боор деп идегээлиңер.

 

03.11.2017 чыл

Метки: 2017 г.

Печать